Gal 2 | MMX | STEP | Ga melemu at lasangaun mi lavanuet maares, agamlong manga uto Jerusalem eburu mi ne Banabas, la ne Taitas bok ga emu minema’.

Galatians 2

Pol Eburu Mi Leventaba Lavaun Pavang Bok

1 Ga melemu at lasangaun mi lavanuet maares, agamlong manga uto Jerusalem eburu mi ne Banabas, la ne Taitas bok ga emu minema’. 2 Agat pas ugo atla, ne Moroa xa ga vaase i ria xusu anat pas ugo. La keneng at lara lixitkis buru atnama mi lubung amgomgo kusuk mun, nenia aga soxomus Lagale Lavavang a vavang min ti limixin kopmen di me Judaia. Nia aga lox i na xusu dina siam mu mo lugugu rak. Lavanga no lugugu avot tarak la ana lugugu at na levenaleng na subu. 3 Ketla diga siam mu levelinga atnama mi ne Taitas, laradi loklok tooro rak. Neni laradi xopmen i me Judaia, la di goxo tong i do ni na vit kepe toxontuxu ren. 4 Ketla leventaba diga vara i xusu dina vit kepe lengkontuxu at luvuttadi nuunu xopmen di me Judaia, la digak lok labala ngan nedi luvuttadi nuunu la nedi na lemet tadi digak beles mun at libinam atnema ngan luvuttadi vereven alii; la diga vavara mun i xusu dinang long terek lesepsepmus tinotno basinge Lenavolo nema magak lok kaka i xeneng at ne Iesu Karisito. Diga vara mun i xusu dinak lok ka nema ukeneng at leveloklok atnedi, la manak lok maxopok at leventaangas at Lenavolo. 5 Ketla nema ma goxo ronga res atnedi at tekonaleng, atla ma goxopara i xusu mana lok lodoxoma atnemi na xipgas la mina doma xepe Lagale Lavavang i ruturun.

6 Tinedi no limixin di tong di do lubung amgomgo at lotu, nenia axo doma solo i do nedi di silok kopla xopmen; atla ne Moroa xopmen na viila mumu leveloklok at tara mi levereven teren. Nedi di goxo vaase bok ba tekolinga mavana at lavavang tarak. 7 Ketla nedi diga ven kibis i do ne Moroa ga raba ia mi lugugu silok ti paase asu Lagale Lavavang ti limixin kopmen nedi me Judaia, ga lok ngan pam neni ga raba bok pam ne Pita mi lugugu silok ti vavang mi Lagale Lavavang ti limixin me Judaia. 8 Moroa ga lox alolos ne Pita xusu neni laradi vavang ti limixin me Judaia la kerepmo bok neni ga lox alolos ia xusu nenia laradi vavang ti limixin kopmen di me Judaia. 9 La ne Jems, ne Pita la ne Jon, nedi na lubung angkipkip at lotu, diga ven kibis i do ne Moroa ga raba nema’ mi ne Banabas mi na lugugu i lok petpes tinotno; kuren la diga etep tikngen minama’ mi ne Banabas, ga lok ngan loklok katling do nema axap ma ruuna legesa gugu mene nga. La diga lok lisisiam do nema’ mi ne Banabas, maba gugu xantubu at limixin kopmen di me Judaia, la nedi diba gugu ro at leme Judaia. 10 La nedi diga vara i xusu nema’ mana doxoma bok levempakpakes at limixin banbalo kantubu atnedi, nenia aga ruuna lodoxoma liplivi rinotno ri lok na lavanga.

Pol Ga Vaase Lolos Ti Ne Pita Ro Antiok

11 Ketla at loxonaleng ne Pita gat pas uto Antiok, nenia aga vaase tangarang tinotno i at lemeren e, atla ga xasep tinotno do neni ga soogong. 12 At lara laaleng ne Jems ga riki lentaba luvuttadi nuunu me Judaia ugo; avot ti lovotpot atdi, ne Pita nga no garak lok pam la gara vaanan eburu mi limixin kopmen di me Judaia. La melemu at loxonaleng na luvuttadi me Judaia diga vot, neni goxo an eburu bok ba minedi, atla neni ga marat at Lenavolo at leme Judaia mumu loklok ti ke laanan eburu mi limixin kopmen di me Judaia, la atla neni ga anan eburu mi luvuttadi no di goxo vit kepe lengkontuxu atdi. 13 La nedi bok mo leme Judaia mego Antiok, digara lok ngan bok laxampanga makmarat ngan bok ne Pita; la ne Banabas bok gara mu asu bok nedi la nedi axap diga soogong.

14 Kuren la at loxonaleng nia aga ven i do nedi di goxo mu asu langas mokmokso mi luruturun at Lagale Lavavang, aga vaase ri ne Pita ro melamgo rinotno atnedi axap keretna, “Nenu laradi me Judaia, ketla nenu nom e, u mumu asu leveloklok at limixin kopmen di me Judaia, la uxop tuvuk ngan laradi me Judaia. Kuren la ua lavasuun teren la u sat ka limixin kopmen di me Judaia xusu dina mumu asu leveloklok at leme Judaia?”

Limixin Di Roo Suu Mumu Mun Lunuunu Atnedi

15 Limixin me Judaia di tong i xeretna, “Nema limixin me Judaia, la nema xopmen mana ngan nedi limixin kopmen di me Judaia dixo mumu asu Lenavolo.” 16 Ketla nema leme Judaia maklen i do, laradi mun i nuunu at ne Iesu Karisito, neni mun i sepmus basinge loklok kakapmek, la kopmen do i mumu asu Lenavolo. La kerepmo bok ma nuunu at ne Iesu Karisito xusu manaba sepmus basinge loklok kakapmek, kopmen do ti mumu asu Lenavolo. Ana kopmen noxo ravasu at loklok ti mumu asu Lenavolo, atla kopmen teta naba sepmus basinge loklok kakapmek do neni na mumu asu mun Lenavolo.

17 La amo do nema ma doma i do mana lok kepe Lenavolo la mana sepmus basinge loklok kakapmek keneng at lunuunu atnema saparap ne Karisito, anai naba lox asuusu i do nema limixin ma ruuna laxapmek mila ma lok kepe vam Lenavolo. Kereva ba, lunuunu saparap ne Karisito i lok nema ngan luvuttadi xapmek, kuren la ne Karisito i lox asu laxakapmek? Kopmen tinotno. 18 Do nenia anamlong ti loklok at Lenavolo no nenia aga lok kepe i, anaba lox asuusu i xeretna do nenia laradi rongtonga xepe at Lenavolo. 19 Lavasuun at na xeretna. Lenavolo ga lox ase ia do nenia laradi xapmek, kuren la aga lok ka lunuunu maxat la aga sepmus ba basinge Lenavolo. La mo nga nia a epovo na rooro ti lok lugugu at ne Moroa. 20 I lok ngan ta do diga vaxarem ia eburu mi ne Karisito ro at laxaba; la kopmen nenia xa na a rooro, ketla ne Karisito axa na i rooro xeneng tarak. La lorooro nenia ak lok keneng teren, ni lorooro mi lunuunu keneng at ne Nitna ne Moroa, la neni ga balamu ia la ga raba lorooro ren kusu na uu nop loklok tarak. 21 Nenia a xopara i xusu ana sok tixirixes letaba nabalamu at ne Moroa. Ketla do taradi na doma i do neni naba sepmus basinge loklok kakapmek mumu lumumu asu ren at Lenavolo, i milik ngan ta keretna do, goxopmen tavasuun ti lanmet at ne Karisito.